Bye Bye 頭瘡!擊破頭瘡前世今生

  頭瘡就好似一段死唔斷氣嘅孽緣咁,生完、好唔容易分咗手,之後又死死地氣咁返番嚟,三粒又三粒,三粒之後又三粒。如果你問頭瘡可以點搞,一律建議要用正確方法分手,因為搞衰咗嘅話,嚴重係可以引致脫髮😖。今次同大家逐一擊破頭瘡嘅前世今生,教大家點同難纏嘅頭瘡說再見!   #生頭瘡主要成因 點解頭瘡會出現呢?其實會生頭瘡係因為頭皮嘅毛囊發炎,主要分為「細菌性毛囊炎」同「黴菌性毛囊炎」兩種。當頭皮唔健康,毛囊過度分泌油脂,再加上舊角質囤積灰塵等外界污染物,原本乾淨嘅頭皮就會變成培養細菌嘅溫床。毛囊容易阻塞,累積一段時間之後會形成輕微毛囊炎引致脫髮!   #咩情況下頭瘡會引致脫髮? 細菌性毛囊炎 平時頭皮會出現輕微痕癢,嚴重發炎時會產生強烈刺痛感。一般會自行痊癒,亦唔會造成脫髮,但如果完全唔理佢,係有可能惡化成「蜂窩性組織炎」,到時就麻煩! 黴菌性毛囊炎 初期只會覺得頭瘡同頭皮變多,然後會出現局部脫髮。如果唔及時治療,感染範圍有機會擴大,脫髮情況會變得更嚴重,再唔理佢嘅話,喺毛囊長期發炎嘅情況下,將會破壞毛囊引致脫髮!   #頭瘡疤痕寸草不生 有冇試過生完頭瘡個位變咗疤痕?如果有你就要小心了。頭皮構造分表皮層同真皮層,一但處理頭瘡不當,例如大力擠壓,有機會導致皮膚組織永久受損,喺頭皮留低疤痕。唔單止外觀上有影響,有疤痕嘅位置更有可能因為皮膚組織增厚而無法長出頭髮。即係點?頭瘡範圍愈大,甩頭髮嘅範圍就愈大,視覺上就好似「突然冇咗忽頭髮咁」,所以千祈唔好睇小頭瘡嘅後遺症呀~   #預防勝於治療 意識到生頭瘡嘅嚴重性,就要乖乖喺生活開始入手預防頭瘡。 洗頭力度 過於用力洗頭會令頭皮毛囊損傷,繼而變得脆弱同容易感染細菌。另外提提大家,洗頭時千祈千祈唔好用指甲刮頭皮,輕輕用脂肚按摩就夠㗎喇。 生活作息 都市人作息唔規律(即係唔好再日夜顛倒掛住打機太夜瞓)、飲食唔正常等都會令人體抵抗力下降,連帶降低埋皮膚嘅免疫力,變相增加毛囊炎嘅發病率。 保持清潔 唔止講緊頭皮同頭髮,平時會接觸到頭部嘅梳、帽、枕頭、毛巾呢啲都要勤力啲清潔,咁先可以杜絕頭皮細菌滋生。   #頭瘡治療攻略 百密一疏,如果做好上面預防功夫,頭瘡都堅持嚟搵你嘅話,咁就要快手用頭瘡產品盡快治理。含有 Selenium Sulfide、 Zinc Pyrithion 或消炎精油成份嘅洗頭水,可以控制頭油分泌同抑制真菌,透過破壞真菌生長環境嚟全面改善頭皮問題;另外亦可以選擇用含有薄荷成份嘅洗頭水,具有止痕作用,減低抓傷頭皮嘅機會之餘亦有效紓緩頭皮脫落嘅情況。 治療期間,記得盡量減少使用護髮素,平時富黏性又有營養嘅護髮素可以幫助改善頭髮健康,但如果喺頭瘡旺盛嘅時期用,反而有機會幫倒忙!最後嘅最後,請大家忍手唔好 R 頭瘡,因為周圍 R 會將細菌帶埋去新傷口令佢發炎,再不斷重覆又重覆咁引發連鎖效應再生更多頭瘡,所以切記要忍手! 下面介紹兩隻專治理頭瘡嘅洗頭水畀大家。首先講講意大利 Davines Naturaltech Purifying 去頭皮頭瘡洗頭水,呢個牌子係以採用天然成份配方出名,而 Purifying 呢支就含有天然蒲公英植萃菁華,有抗炎、抗菌同鎮靜作用,有效抑制真菌生長減少頭皮頭瘡。 Davines Naturaltech Purifying 去頭皮頭瘡洗頭水 了解更多   另一隻客人 Feedback 好用嘅仲有 O'DOUDS 活髮洗頭水,美國出產,天然溫和配方含有蘆薈同茶樹油(Tea Tree)精油等成份,有效抵抗發炎、頭皮屑甚至牛皮廯,同時仲可以為毛囊提供能量,令頭髮更密緻咁健康生長,減低折斷情況。 O'DOUDS 活髮洗頭水 了解更多       延伸閱讀 個個都洗頭,你估個個都識洗咩😂 其實 Eau de Toilette 同廁所有咩關係?男士香水百科全書 是但求其 Gel?頭髮造型新手教學
2021-04-21

㊙ 軟髮 Gel 頭師!幼軟頭髮造型及護理攻略

  上回分享粗硬髮男士嘅造型攻略(延伸閱讀:硬髮 Gel 頭師!粗硬頭髮……),今次就講埋另一種苦惱 - 就係男士最驚嘅又軟又幼……諗咩呀,講緊啲頭髮啫。天生頭髮幼,除咗髮量睇落冇咁豐滿,另一個常見問題就係 Gel 極都 Gel 唔起,或者個頭超級無敵易塌。放心,仲有得救嘅,呢篇就同大家探討下適合幼軟髮質嘅造型小技巧!   #點解你係幼軟髮質 幼軟髮質泛指頭髮比較幼軟、缺乏支撐力,大致可分為先天同後天成因。先天因素大致可分為兩種,第一種係遺傳因素令頭髮嘅皮質層比較薄所致,第二種係受男性荷爾蒙影響而引致脫髮,過程中會令頭髮慢慢變幼變薄同軟化。後天因素呢多數係同你飲食習慣有關,生活壓力亦都會有影響㗎!呢度再講多小小,其實亞洲人嘅頭髮平均直徑有 0.09 毫米,而歐洲人呢平均直徑只有 0.07 毫米,所以頭髮嚟講,亞洲人已經叫做得天獨厚,普遍比歐洲人嘅粗壯。   #幼軟髮質造型最大困難? 由於幼軟髮質缺乏支撐力,若然造型產品選擇不當,例如揀咗啲較重身嘅 Product,好多時就會出現髮型扁塌同缺乏豐盈感嘅狀況,觀感上髮量都會少啲,比較難塑造出造型嘅立體感。咁到底幼軟頭髮最適合揀咩造型產品呢?使用上又有冇咩特別的技巧呢?以下張梁記將會根據多年男士造型經驗,分享絕密造型攻略!   軟髮 Gel 頭秘技 1 #必需使用打底造型產品 造型打底,一般我哋會叫「打底」或者「Pre-Styling」。通常我哋都會建議大家 Gel 頭前洗一洗個頭清走頭油,用熱風吹乾後再做造型,而打底就係指喺吹頭髮過程中使用嘅預先造型產品,例如 Grooming Tonic,用咗的話係可以喺盡量唔增加頭髮重量之下令頭髮變硬、增加頭髮嘅支撐力同提升造型持久度。簡單嚟講,其實頭髮就好似建築用嘅鋼根,將頭髮變硬身同預先喺吹頭時先稍稍整理出造型嘅大方向,就係為 Gel 頭打好基礎。 By Vilain Zero Sidekick 有機打底水 了解更多   軟髮 Gel 頭秘技 2 #嚴選輕身造型產品 缺乏支撐力嘅軟髮,其中一個大忌就係使用具重量嘅造型產品,亦解釋咗點解明明落足 Gel,但往往出街唔夠幾個鐘個頭就極速扁塌。無論你揀嘅係髮油、髮蠟定髮泥,幼軟髮質人士一定要特別留意造型產品嘅重量,了解清楚產品係咪含有較多水份,又或者試上手喺掌心推開時會唔會好厚身。一般嚟講,水溶性髮油(Gel-Type Pomade)係屬於較多水份嘅產品,而髮泥含水量就會較少。留意返,如果產品特別標榜擁有最硬/Super Hard 造型力嘅話,呢類產品通常都會比較重身,建議幼軟髮質嘅朋友可以向中至高造型力嘅產品著手。 Firsthand Supply 混合髮泥髮油 了解更多     軟髮 Gel 頭秘技 3 #選擇較乾身嘅髮泥產品 嚟到 Gel 頭嘅重點,幼軟人士一般髮量都會較少,如果再用含水量高嘅產品,成個造型望落會更薄同容易見到頭肉,呢個係幼軟髮 Gel 頭師嘅大忌!!!我哋會建議盡量揀返較乾身嘅髮泥產品,如果想進一步提升髮型厚度同豐盈感,可以考慮揀含有高嶺土成份嘅髮泥,Gel 出嚟嘅效果會更顯年輕同有活力~不過,使用較乾身產品可能會遇到另一個問題,就係啲泥太乾身推唔開較難用,呢個時候可以喺手掌加幾滴水,會令產品更易推開而唔會影響產品嘅造型力。 嵐 無光澤高嶺土髮泥 了解更多     軟髮 Gel 頭秘技 4 #噴定型噴霧都有技巧 最後就到定型噴霧,唔知大家有冇留意,使用定型噴霧(Hair Spray)時其實都帶有幾大嘅噴射力,而呢股衝擊係足以壓低你啱啱用心 Gel 咗 20 分鐘嘅髮型,加上定型噴霧變硬速度非常快,如果只喺表面亂噴一通,已經可以幻想到變硬後會令頭髮表層形成一個蓋,而底部頭髮又因為冇接觸定型噴霧,所以重量就會聚晒喺髮頂慢慢向下扁塌。解決方法係可以選擇噴嘴比較細、可以噴出霧化嘅定型噴霧產品,記得噴 Spray 時盡量保持一段距離(最少約 30 cm)同避免集中只噴一個位置! Suavecito 古龍香氣強力定型噴霧 了解更多   軟髮造型秘技 5 #髮型幫到你 呢個秘技就唔太關 Gel 頭技巧事,但經驗之談,剪個易打理嘅髮型某程度上都幫到你戰勝幼軟髮質嘅造型困難!因為本身個頭已經唔太夠支撐力同厚度,如果留中長髮型就要花更多時間喺打底同吹頭步驟,做好細膩位先可以保持造型持久度,如果你平時冇咩時間,又或者懶打理嘅話,剪返個短髮可以減低每日造型所需時間,配合剪髮技巧仲可以令成個髮型望落更豐盈,例如 Undercut、Crew Cut 都好適合軟幼頭髮人士~   以上係張梁記根據多年來接觸唔同客人所累積嘅經驗同心得,有咩問題可以喺 Facebook/IG 搵我哋一齊研究下,例如想知邊隻 Product 可以做到你嘅要求,都可以搵我哋傾㗎!     延伸閱讀 ㊙ 硬髮 Gel 頭師!粗硬頭髮造型及護理攻略 髮油 VS 髮泥 VS 髮蠟 - 3 步學識揀啱自己用嘅造型產品 是但求其 Gel?頭髮造型新手教學
2021-04-19

㊙ 硬髮 Gel 頭師!粗硬頭髮造型及護理攻略

  有啲嘢應硬就該硬,例如男人嘅腰骨、拳頭,但頭髮呢就真係未必想太粗硬喇,因為 Gel 頭嚟講粗硬髮真係好難搞,可以話係唔少客人朋友嘅頭號困擾!「頭髮太硬好難 Gel 上去呀,勁易散」呢句說話基本上每日喺 DM 或者門市都會聽到幾次😂,針對呢個問題,等我哋又分享下到底有冇啲咩嘢可以做去軟化頭髮,同埋粗硬髮質嘅一啲 Gel 頭技巧!   #點解你係粗硬髮質 頭髮係粗定幼、直定攣,其實你嘅命運好大程度係由頭髮表皮層同皮質層決定咗。一般皮質層平均有 3 - 5 層,而粗硬髮嘅皮質層係高達 10 層咁厚!你可能會問,咁有冇得唔要咁多層呀?係冇嘅,因為皮質層嘅厚度係遺傳㗎,並唔能夠輕易改變……不過唔使灰心住,後天我哋都仲有嘢可以做,唔好放棄呀大家,一齊睇落去~   #粗硬髮質造型最大困難? 兩個字講晒,難搞!難 Gel、定唔到型好易散、啲頭髮好似過度活躍咁控制唔到方向,總之就頭都大!   秘技 1 #正確嘅洗頭大法 溫水洗頭 建議用約 40 度嘅溫水徹底淋濕頭髮,溫度盡量唔好過高或者過低,以免洗得唔乾淨或者燙傷頭皮。 掌心起泡 洗頭時避免將洗頭水直接倒喺頭髮上,可以先將洗頭水倒喺掌心搓至起泡再搽喺頭髮。 指肚按摩 洗頭時切記唔好過分用力擦洗,亦唔好用指甲 R 頭皮,可以用手指肚輕輕按摩頭皮同髮絲,最後徹底沖水。 除咗要學識洗頭技巧,原來 Keep 住每日洗頭都係一個良好嘅護髮習慣。香港嘅空氣污染嚴重,香港人生活壓力大容易導致精神緊張,呢啲因素都會影響頭髮健康,而經常洗頭除咗可以幫助清走頭髮上嘅塵、污垢同油脂,仲可以加強頭髮表層嘅保護,令頭髮保持柔順有光澤。     秘技 2 #洗頭水要識揀保濕 補水保濕 粗硬頭髮一般缺乏水份,嚴重乾燥係令頭髮變到鋼線咁嘅最大原因。選擇有保濕成份嘅洗頭水,可以為髮絲補充足夠水份,令頭髮回復彈性同光澤嘅狀態。 油份滋養 含有天然植物萃取精油嘅洗頭水可以代替日常頭油分泌,一般呢種油質都會相對輕盈而且容易吸收,幫助頭髮變得柔順有光澤。 O'DOUDS 活髮洗頭水 了解更多 Davines Naturaltech Renewing 再生防禦洗頭水 了解更多   秘技 3 #唔準懶記得護髮 選擇輕身嘅護髮素 護髮素可以幫助軟化表皮層令頭髮變得順滑,用後髮絲會比較容易彎曲方便造型,另外亦能為頭髮形成保護膜,有助隔絕空氣污染物同造型產品嘅殘餘物。有別於女士,我哋會建議男士可以揀一啲唔需要太強黏性長期留喺髮上、相對較輕身嘅護髮素,盡量以保持頭髮清爽為前題,一星期使用 3 次左右,可以為頭髮提供適當嘅保養同護理,為 Gel 個靚頭打個完美根基,溫提記得唔好捽落頭皮度~ 髮尾油 - 最佳短期功效 以上所提及嘅洗頭水同護髮素,講緊嘅係一個持之以恆嘅長期育養過程。如果想短期見效,可以用 Leave-in 嘅產品去改善髮質快速軟化頭髮。都係嗰句,男士頭皮一般較女士易出油,所以輕身嘅髮尾油或護髮奶會係最佳選擇,每次用 2-3 滴就夠。 Davines Naturaltech Renewing 更新頭皮頭髮修護霜 了解更多     秘技 4 #選擇Hold力強嘅造型產品 記住,愈硬嘅頭髮就應該揀啲 Hold 力愈強嘅造型產品,因為呢啲 Product 通常會比較有重量,可以幫手壓低啲難搞嘅尖尖髮絲,同有助你控制頭髮造型方向,輕鬆做出你想要嘅造型效果!水溶性髮油(Pomade)、微濕髮泥(Clay Pomade)呢啲就好啱粗硬頭髮人士使用,利用水份含量高呢個特點,可以減低望落毛燥嘅感覺。 江獸 x 張梁記龍寨版髮油 了解更多       以上係張梁記根據多年來接觸唔同客人所累積嘅經驗同心得,有咩問題可以喺 Facebook/IG 搵我哋一齊研究下,例如想知邊隻 Product 可以做到你嘅要求,都可以搵我哋傾㗎!     延伸閱讀 ㊙ 軟髮 Gel 頭師!幼軟頭髮造型及護理攻略 是但求其 Gel?頭髮造型新手教學 又話盒髮泥/髮油好用……點解自己 Gel 就出晒事?
2021-04-19

一蚊銀拔鬚?!窺探世上四大剃鬚工具!

  傳說中嘅一蚊雞拔鬚,有冇人試過?我就係個勇者喇😂,又慢又痛,真心拔到攰。其實剃鬚有好多方法,可以的話都建議大家唔好挑戰人體極限啦!一直都有好多人問,到底安全剃刀、傳統剃刀同多層刀片有咩分別,呢度介紹返,大家對症下藥搵返把啱自己用嘅剃鬚刀啦~😉   #安全剃刀 #Safety Razor 香港呢兩年興玩復古風,連帶亦捲起一股安全剃刀浪潮。比起其他剃刀,安全剃刀嘅設計通常會比較復古懷舊,亦因為特別設有 Safety Guard,所以大大提升咗使用時嘅安全性,可以減低剃傷機會。安全剃刀嘅另一特點係刀片會比較貼面,準確度提高,能夠有效減少鬚根殘留黑點。安全剃刀仲有個好處,就係佢非常容易清洗,更換刀片嘅成本亦極低,每片低至 1 - 2 蚊,所以用安全剃刀嘅乾淨指數係非常高,得到唔少新用家嘅好評! 使用小心得 記得配合剃鬚膏使用,可以提供潤滑保護,減少剃刮時皮膚嘅不適感 Edwin Jagger 傳統安全剃鬚刀(八角形黑色烏木設計) 了解更多   #傳統剃刀 #Straight Razor 最原始嘅剃刀原型設計,如果你有落過去 Kingsland Barber 剪頭髮嘅話,應該都會見過佢。傳統剃刀可分為「更換刀片式」同「磨刀式」兩種,不過基於衝生問題,「更換刀片式」而家已成為主流。一般我哋會用呢種剃刀嚟為鬍鬚修理造型,會比其他款式嘅剃刀更精準,係留鬚人士或 Barbershop 理髮師必備嘅法寶。 使用小心得 傳統剃刀相比起其他剃刀會需於多啲技巧去控制,建議多練習就能流暢使用 Barbarossa Brothers 原木直式剃刀 了解更多   #多層刀片剃刀 #Multi-Blade Razor 刀頭前通常設有順滑膠去提升剃刮時嘅流暢感,多重刀片嘅斜側設計安全性亦較高,操作簡單,新手都能夠輕鬆上手!不過,相比起其他剃鬚刀,呢種剃刀嘅設計會冇咁貼面,刀片亦冇咁鋒利,用家可能需要來回刮多幾次先可以完全剃淨鬚根。清潔方面,一體成型刀頭會比較難去處理刀片間殘餘嘅剃鬚膏同鬍渣,選擇更換刀頭嘅話,成本亦相對比較高,價錢約為 $20 - $30 一個。 注意 多層刀片剃刀係非常方便,但對皮膚嘅傷害亦較大,以 5 刀片為例,每剃一次就等於剃刮皮膚 5 次,來回剃 4 次,即係皮膚已經經歷咗 20 次嘅剃刮。 Edwin Jagger 吉列 Fusion® 剃鬚刀(牛骨質感設計) 了解更多   #一蚊銀拔鬚術 #Two Coins Pulling 原理係用 2 個硬幣去夾住鬍鬚,然後用力將其拔出,係接近零成本嘅移除鬍鬚方法!不過研究指出,硬幣上嘅細菌其實比馬桶更多,講緊係可以有高達廿種細菌喺上面生存,衰啲講句,簡直係衰過廁所!其中就有著名嘅抗藥性金黃葡萄球菌,嚴重嘅話係會引起發炎同膿瘡,極難根治,所以都係唔好挑戰極限喇,乖乖用返剃鬚刀打返安全牌啦!        延伸閱讀 剃鬚之謎 - 明明冇剃損,點解都咁痛㗎? Bye Bye 頭瘡!擊破頭瘡前世今生 又話盒髮泥/髮油好用……點解自己 Gel 就出晒事?
2021-04-16

髮油 VS 髮泥 VS 髮蠟 - 3 步學識揀啱自己用嘅造型產品

  Gel 頭者們內心都有個小劇場,究竟應該買髮泥、髮油、髮蠟,定買髮泥加髮油好呢?明明大大隻字寫住 Matte,點解出到嚟又有啲令唔係啞身呢?係咪欺騙我感情呢?媽呀我好亂呀。等我哋用 1 分鐘同大家溫故知新,教大家點樣揀啱自己用嘅造型產品啦!   #想要嘅效果? 揀產品之前先問自己三條問題: - 想梳整齊油頭/手摷/ Casual Style? - 高亮度/低光澤/真啞乾? - 以變硬/高黏度嚟維持造型?   #髮油(Pomade)For 整齊油頭造型 通常用於梳理貼服整齊髮型,即係大家成日講嘅油頭。髮油一般都會較為有光澤,產品水份含量亦會較高,定型力亦較強,正確使用可以維持頭髮造型一整日,適合任何人士使用。 主流路線:水溶性髮油容易清洗同方便易用 傳統路線:多為油性髮油,光澤度高但較難清洗 江獸 x 張梁記龍寨版髮油 了解更多   #啞光髮泥(Dry Matte Clay)For 手摷 Texture Look 效果會較為乾身啞色,可營造凌亂同蓬鬆效果。使用乾身髮泥時會有輕微拉扯頭髮嘅感覺,用後頭髮會略帶毛燥。非常適合髮量較少嘅人士使用,用後可提升成個髮型嘅豐盈感,睇落髮量會立即增多。  Luxignite Matte Clay 了解更多   #微濕髮泥(Hair Clay)For 簡潔整齊髮型 帶有輕微光澤同時具有層次感,部分產品可以用闊齒梳適度梳理髮型。如果想玩分界,建議可使用微濕髮泥,分界位會較清晰易處理。另外,由於微濕髮泥嘅水份含量較高,搽上頭後可大大減低毛燥感,但有個小缺點就係頭髮重量會增加,長時間使用可能會出現輕微扁塌情況,可按需要另加定型噴霧去增加持久力。適合髮量較多人士使用。 Firsthand 混合髮泥髮油 了解更多   #髮蠟(Hair Wax)For 自然輕鬆風格 髮蠟可以話係市場上最令人混淆嘅稱呼,對於分唔清嘅產品,坊間通常就會歸類做髮蠟,但中間區別其實可以好大。簡單嚟講,髮蠟嘅主流定位大概喺髮油同髮泥之間,多為帶有微光澤,效果走自然 Casual 風格,部分可用手摷,亦有啲可以用梳整理,一般較易清洗。 K Candy Floss 髮蠟 了解更多    使用小心得 髮油:建議用一個手指頭份量,使用份量愈多,成個造型嘅黏力同定型力都會相對提升 髮泥、髮蠟:建議可以用「少量多次」嘅方式慢慢均勻地搽上頭,以免用量過多造成扁塌情況難以定型。 另外,無論係髮泥/髮油定髮蠟都好,我哋都唔建議直接搽落濕頭髮上面。因為水溶性產品遇上太多水份係會導致造型力大減。如果產品略為乾身較難推開,可以喺手心加 1 - 2 滴水以便推開使用。   魔鬼在產品細節 #光澤度 #固定力 #重塑力 張梁記會為每件造型產品進行實測,並為產品如光澤度、固定力同重塑力等評分,等大家可以對產品有更準確嘅了解,幫助大家去揀隻最啱自己嘅 Product。 光澤度 由真乾啞/濕啞/中光澤到最令身嘅高光澤度,以 5 星為最令身。 固定力 即產品嘅持久力同硬度,以 5 星為最高。效果會因應使用分量、用家髮質同當日溫度及濕度有所影響。建議粗硬髮質可選擇 4 - 5 星產品,以提高造型持久度 重塑力 指搽落頭後會否隨時間變乾變硬。如果會變硬,重塑力大概會落喺 2 - 3 星左右;如果產品係以黏性作為固定力支撐,搽上頭後就唔會變硬或變乾,重塑力會保持 4 - 5 星。   #產品實測 Firsthand All-Purpose Pomade 了解更多   Firsthand All-Purpose Pomade 於「水溶性髮油」分頁內嘅髮油(Pomade)產品都適合用作梳理整齊髮型 固定力:★★★★★ 造型力非常高,粗硬頭髮亦啱用 重塑力:★★★★☆ 有 4 星即表示有相當高嘅重塑力,產品以黏性作造型力,唔會變硬變乾 光澤度:★★★☆☆ 偏向自然光澤,會睇得出有用造型產品,但唔會特別令身或者乾啞 易洗度:★★★★★ 水溶性產品一般都較易清洗,普通落洗頭水洗就可以         延伸閱讀 是但求其 Gel?頭髮造型新手教學 又話盒髮泥/髮油好用……點解自己 Gel 就出晒事? ㊙ 軟髮 Gel 頭師!幼軟頭髮造型及護理攻略
2021-04-16

是但求其 Gel?頭髮造型新手教學

  論盡半生不懂 Gel - 點 Gel 都唔滿意,Gel 極都係捱唔夠半日就塌,點搞好😫?次次睇人 Gel 頭好似好易呀,摷兩嘢就搞掂,點解返到屋企自己整就咁 Seven,係咪騙局嚟?其實 Gel 頭係有特別的技巧㗎,做好下面幾個步驟,就可以輕鬆減低失敗機率!   步驟 1 #洗濕個頭  朝早起身,唔好諗,第一時間勇敢啲洗濕個頭先!洗走頭油保持清爽可以更易造型,冇時間的話都盡量用清水噴一噴濕啦,但如果你係比較多頭油,建議呢個步驟唔好 Skip,落埋洗頭水洗效果會更好!   步驟 2 #落打底水 + 吹頭  洗完頭就可以噴打底水,呢個 Step 可以令你嘅頭髮望落更有層次同增加蓬鬆感,所以一定要噴一定要噴一定要噴(好重要所以要講 3 次)。如果你冇用開打底水唔知買邊隻好,下面介紹兩隻張梁記最好賣嘅畀你。根據髮量大概噴 4-5下,再用熱風向你想要嘅造型方向慢慢吹乾吹鬆成個頭。嚟到呢度,你已經完成 Gel 頭嘅準備步驟~   Reuzel 打底水(噴咀裝/倒裝) 了解更多   O’DOUDS 天然海鹽打底水(噴咀裝) 了解更多     步驟 3 #Gel頭 首先將一隻手指頭份量嘅髮泥放喺手心搓勻,份量可以根據髮量自行調校,但切記千祈唔好過量呀,如果唔係會令頭髮望落黐笠笠!跟住將髮泥均勻咁搽喺全部頭髮上,再用手指慢慢調整造型製造層次感,以下去片介紹返 Gel 頭手勢,記得畀啲感情同技巧~😊      Luxignite Matte Clay 髮泥(啞光、樽蓋附香水膏) 了解更多       延伸閱讀 ㊙ 軟髮 Gel 頭師!幼軟頭髮造型及護理攻略 ㊙ 硬髮 Gel 頭師!粗硬頭髮造型及護理攻略 髮油 VS 髮泥 VS 髮蠟 - 3 步學識揀啱自己用嘅造型產品
2021-04-16

其實 Eau de Toilette 同廁所有咩關係?男士香水百科全書

  男士香水有好多種,先唔講前中後調,淨係香水啲名已經搞到唔少人頭都大埋﹐又法文又英文咁。到底 Eau de Toilette 同廁所有咩關係?係咪用嚟噴廁所㗎?Parfum 同 Cologne 又有咩分別?媽呀好亂呀~😫   #此Toilette非彼Toilet 其實呢個 Toilette 同廁所係冇咩關係。雖然望落似英文 Toilet,但佢係法文嚟,意思係「梳妝/打扮」,而放喺香水標籤即係代表佢係淡香水,下次唔好再以為佢係廁所專用喇 !😂 Toilette (n) 1. The process of grooming and dressing oneself   梳理及打扮自己的過程 2. Dress; Attire   打扮;裝扮   #男士香水種類   再講多小小,其實香水主要由水 + 酒精 + 香精製成,根據香精濃度,市面上嘅香水大致可分為 5 種 - 由最淡嘅 Eau Fraîche(1-3%)、Eau de Cologne(~5%)、Eau de Toilette(~10%)、Eau de Parfum(~15%) 到最濃嘅 Parfum(>20%)。而主流味道多為偏向木味、煙燻、海水或者果味,新手想穩陣起見可以由淡味入手,又或者按返自己口味選擇,最緊要係自己喜歡,始終係噴落自己度嘛!  Mistral 清爽鹽香氈酒古龍水 了解更多  TRUEFITT&HILL 清新檀木古龍水 了解更多   #正確使用方法  通常會建議噴喺能夠感受自己脈搏嘅位置,例如頸、手腕等等,由於呢啲部位會發熱,熱量係可以令香味更持久,亦有男士鍾意噴喺耳仔後面,另一半聞到時就更顯親密。如果古龍水冇噴嘴,可以使用塗抹方法。將手指放喺樽口,微微傾斜瓶身,再將手指上嘅古龍水輕輕咁搽喺合適位置就可以!   #另一種選擇 #固體古龍膏 近年亦開始流行固體古龍膏(Solid Cologne),相比起古龍水,固體古龍膏味道會比較含蓄,體積亦會偏向細細粒更方便攜帶,放入健身袋、衫袋褲袋或者隨身行李就可以隨時出街補搽。  Luxignite 有機固體古龍膏套裝(黑盒特別版) 了解更多 Analogue Apotik 固態古龍膏(Cleopatra) 了解更多     延伸閱讀 髮油 VS 髮泥 VS 髮蠟 - 3 步學識揀啱自己用嘅造型產品 個個都洗頭,你估個個都識洗咩😂 ㊙硬髮 Gel 頭師!粗硬頭髮造型及護理攻略
2021-04-15

剃鬚之謎 - 明明冇剃損,點解都咁痛㗎?

  十個男人十個都遇過,而當中大概九個都解釋唔到 - 明明我剃鬚已經剃得好小心,點解冇剃損都仲會咁痛?其實唔止剃鬚,剃其他毛髮都會出現咁嘅情況。   #刺痛感成因 出現灼痛或者紅疹通常係因為乾剃或者剃鬚時太大力而造成皮膚敏感症狀(Razor Burn),記住,如果 Feel 到皮膚有啲 Dry 就唔好夾硬上陣,監粗嚟大大力剃不但唔 Work,仲會整傷肌膚😫!想避免刺痛感,就要記住以下三個小秘訣!   秘訣 1 #保濕保濕保濕 好重要所以要講三次,還原基本步最緊要保濕先。剃鬚膏係唔 Skip 得,因為裡面有保護肌膚嘅潤滑成份(常見如蘆薈、桉樹油、荷荷巴油等),而且有水份嘅鬚根亦會脹啲、柔軟啲,剃嘅時候就可以輕力小小,不但能夠減低鬚根拉扯,亦冇咁易刮傷肌膚。 若然你願意花多兩分鐘時間,其實用打泡嘅剃鬚膏係會比一般濃縮製作嘅剃鬚膏更加厚身同耐用。要出國工幹或去旅行嘅亦唔需要太擔心,番梘狀剃鬚膏其實幾環保方便,可以直接放入手提行李箱就得,不過可能要花多小小心機打泡。若然你自認有小小懶🤪,建議都係用返可以直接搽上面嘅 Cream 啦,一開即用其實已經好夠濕潤,千祈唔好揀自己嫌麻煩嘅產品,經驗話畀我哋知,到最後好大機會你會直接嫌煩唔用或者 Hea 咗搽剃鬚膏呢個步驟,所以,揀返符合自己習慣嘅就得了。 提示:皮膚敏感人士可以留意返剃鬚膏成份有冇容易引起敏感反應嘅防腐劑,盡量揀返啲溫和成份嘅會更安全,例如 Edwin Jagger 下面呢款。另外可以選擇有加草本精華嘅產品,會有鎮靜肌膚效果。 Edwin Jagger 剃鬚膏 100ml(檀木味/蘆薈) 了解更多   秘訣 2 #輕手啲 除非你本身手勁好強,大部分人剃鬚時過度用力都係想剃得乾淨啲,因為好似點剃都剃唔貼面咁。唔好嫌我哋長氣,但揀把啱手感嘅剃刀係好重要,另外剃刀太鈍或者損壞亦會影響你控制力度,所以記得要定期更換刀頭,千祈唔好慳嗰幾十蚊。除咗典型吉列刀頭,而家市面上其實有好多新款剃鬚刀,例如 Supply Single Edge 就採用人體工學合金,除咗可以剃得更貼面,更換刀片亦相對會比較安全同方便。鍾意復古但又驚傳統剃鬚刀難駕馭,可以試下傳統安全剃鬚刀,刀片鋒利不外露,適合新手日常使用。 Supply Single Edge 安全剃鬚刀 2.0 啞面黑色 (隨刀附送3個月用量刀片) 了解更多 Edwin Jagger 牛骨設計電鍍手柄 傳統安全剃鬚刀 了解更多   秘訣 3 #剃後保濕消毒 剃完咪走住呀!面部肌膚本身就比其他部位更易敏感,加上剃鬚過程會刺激皮膚,所以洗完面後最好做返基本保濕同消毒,可以減低紅腫情況。部分鬚後水除咗可以做到補濕,仲會有少量酒精消毒作用,以防止細菌感染而成嘅紅腫。不過如果有傷口怕痛又或者皮膚偏敏感,可以選用比較溫和不含乙醇嘅鬚後水或鬚後補濕乳。推薦 Reuzel 隻鬚後水畀大家,好多客人都會選擇用佢,帶有清新柑橘同檀香木香氣,自己聞覺得清爽舒服之餘,重點係咩呀?鬚後水會留喺你面同嘴邊,另一半聞到都會覺得好 Sweet Sweet 😌! Reuzel 鬚後水 (柑橘雪松木/ 經典 Barbershop 古龍香味) 了解更多     延伸閱讀 一蚊銀拔鬚?!窺探世上四大剃鬚工具! Bye Bye 頭瘡!擊破頭瘡前世今生 是但求其 Gel?頭髮造型新手教學
2020-08-31

個個都洗頭,你估個個都識洗咩 😂

  喂喂等陣先,冇理由吖,做咗幾十年人,大大話話都洗咗成萬次頭,淋濕捽泡沖水囉,冇理由會洗錯㗎😨 其實點洗、洗幾多次、用咩洗頭水都好影響你頭髮嘅健康!想愈洗頭髮愈好,就要 Check Check 以下三寶!   #洗頭髮 VS #洗頭皮 頭皮可以稱得上係守護毛囊嘅防火牆,而維持健康嘅頭皮係可以避免好多隱憂,例如頭皮屑、頭皮乾癢同出油過多等等。而如果想頭髮睇落順滑有光澤唔毛躁,就需要做好頭髮嘅清潔同保養,所以頭髮同頭皮其實係有各自清潔嘅重點同原因。不過真正需要清洗嘅其實係頭皮,因為頭髮上面嘅油脂其實係由頭皮而來,而正確嘅洗頭頻率則可以幫你維持健康嘅頭皮。   #問問Master毛 #一日應該洗幾次頭毛 無論你會 Gel 頭與否,每日其實只需洗一次頭就夠(除非你係極多頭油嘅人士)。先講講朝早 Gel 頭時,為咗達到更佳造型效果,建議大家最好先過一過清水,整濕個頭梳順髮理,再用風筒吹頭造型,而多頭油人士可以加 Shampoo 先洗走頭油再做造型。夜晚洗頭時會建議落兩次洗頭水進行清潔。留意返,再多頭油都好,盡量都唔好每日使用深層潔淨洗頭水,因為過份清潔反而會令頭皮敏感不斷分泌頭油,效果可能會適得其反。日常洗頭選用性質溫和而有滋養成份嘅洗頭水已足夠。 另外有個位置大家洗頭時好易會忽略咗,就係後尾枕呢個位,殘留嘅洗頭水同造型產品係引致頭瘡同頭皮痕癢嘅兇手,所以記住要洗乾淨喇!   #工欲善其事必先利其器 最後嘅最後,學識晒洗頭技巧係唔夠,仲要識得揀一支啱自己用嘅洗頭水!坊間其實出咗好多 For 唔同頭皮種類嘅產品,例如油性頭皮可以揀返控油洗頭水,乾性頭皮呢就可以用保濕洗頭水,最緊要留意返洗頭水成分,愈天然對保養頭皮係愈好,盡量唔好貪平貪方便亂買啦,始終頭髮係跟自己一世,放多啲心機落去,佢哋都會陪你耐啲呀!😉 Davines Naturaltech Rebalancing 平衡控油洗頭水 了解更多 BROO 精釀啤酒保濕洗頭水 了解更多     延伸閱讀 Bye Bye 頭瘡!擊破頭瘡前世今生 是但求其 Gel?頭髮造型新手教學 ㊙ 軟髮 Gel 頭師!幼軟頭髮造型及護理攻略
2020-06-08

又話盒髮泥/髮油好用……點解自己 Gel 就出晒事?

  上網成日見啲人 Share 話乜乜乜髮泥/髮油好用,但自己買咗返嚟用就中晒伏,貨不對辦,Gel 到成 Pat 屎咁,係咪連個天都唔鍾意我呀 😫?施主冷靜啲先,其實未必係個產品出事,Gel 落不似預期可能同你髮質、頭皮都有關係!如果你都係其中一個苦主,或者呢篇文可以幫你解開長久以來嘅疑惑。想 Gel 個靚頭,就要由了解自己個頭開始,搞清楚自己啱用同應該避開咩 Product,就唔使再怕買錯射錢落海啦~   #簡單髮質測試 洗完頭,先用毛巾輕輕抹幾下,再用手梳晒啲頭髮去後面 Check 一 Check 你係屬於邊種髮質。髮質硬度主要會決定你適合用邊種 Hold 力嘅造型產品。   第一種:軟幼髮質 如果頭髮貼貼服服咁向晒後,咁你就係屬於軟髮質!中 Hold 力嘅造型產品會比較適合你,因為愈硬嘅產品通常會愈重,如果軟幼髮再用埋重身 product,好大機會出現 Gel 完好硬但同時扁塌嘅尷尬情況。 第二種:正常髮質 如果你發現頭髮散散地,有啲向天有啲又向後咁,你就係屬於正常髮質!幸運的你,市面上大部分產品應該都啱你用,根據想要嘅 Gel 頭效果嚟揀選造型產品就搞掂,不過香港地天氣始終比較濕熱,建議可以用返中至強硬度嘅產品,個髮型就可以 Last 耐啲更持久。 第三種:粗硬髮質 若然你頭髮係前後左右咁分散晒,咁你就係屬於硬髮質。愈硬嘅頭髮應該選用 Hold 力更強嘅產品,持久力會強啲,產品本身亦有適當重量可以幫手控制頭髮方向,令你更易做出想要嘅造型效果!   #你係邊種頭皮性質 除咗髮質之外,亦需要考慮埋頭皮屬性去決定你應該用乾身定油潤感較高嘅產品。   第一種:油性頭皮 只要一日唔洗頭就會又油又塌,頭髮又容易有油膩感嘅話,好大機會係油性頭皮!含有高嶺土成份嘅髮泥會幾適合你用,因為高嶺土吸油吸水嘅能力非常強,可以大大減低頭髮望落油淋淋嘅感覺,反之如果選用油潤感高嘅產品會搞到頭髮勁油又唔 Hold,一個唔覺意會變油頭毒 L! 嵐 無光澤高嶺土髮泥 了解更多   第二種:乾性頭皮 兩日唔洗頭但頭髮都唔會話好油,但容易有頭皮屑嘅你好有可能係乾性頭皮。呢種情況可以揀用髮油或者 Paste,可以解決到毛燥感乾柴柴嘅感覺,成個效果出嚟亦會 Smooth 返好多。如果乾髮再選用乾硬感強嘅造型產品,Gel 頭時會感到頭髮不斷被拉扯,唔止痛仲要完全 Gel 唔到嘅慘況……   第三種:中性頭皮 頭皮乾爽舒適,平時冇油膩或痕嘅感覺的話,恭喜你,因為擁有中性頭皮係最易處理。你只需要理解返造型產品出嚟嘅髮型效果就得,因為中性頭皮髮質嘅還原度係相對較高,只要根據你想要嘅造型揀啱產品,就可以 Gel 到你想要嘅髮型!   #常見 Gel 頭謎思   買咗一款啞色髮泥,明明標榜係啞色乾身,但返到屋企發覺出嚟效果完全唔係啞色,而係令身帶有光澤度? 其實頭髮上有一定嘅頭油,當頭油混合乾性嘅造型產品後,出嚟效果有可能會令光澤度提高,所以一般我哋都會建議返大家 Gel 頭前最好洗一洗個頭先,清水都 Ok,如果係油性頭皮嘅就最好落埋洗頭水洗走頭油,頭髮乾爽啲,出嚟嘅效果就會更貼近你想要嘅造型。   揀咗款中光澤度造型產品,用後發覺亮度不足,而且難以搽上頭髮又或者用完感覺髮質好毛燥,點搞? 咁樣的話,好有可能你嘅頭皮係屬於乾性,當頭髮吸收咗產品水份,出嚟嘅效果就會變得冇咁令身,相對地亦會較難推開。建議可以揀返髮油/Paste 或者 Clay Pomade 呢種 Smooth 啲嘅 Product,都可以減低乾柴柴嘅感覺。   以上係張梁記根據多年來接觸唔同客人所累積嘅經驗同心得,有問題可以喺 Facebook/IG 搵我哋一齊研究下,例如想知邊隻 Product 可以做到你嘅要求,都可以搵我哋傾㗎!     延伸閱讀 個個都洗頭,你估個個都識洗咩😂 其實 Eau de Toilette 同廁所有咩關係?男士香水百科全書 是但求其 Gel?頭髮造型新手教學
2020-05-22